"في دي الليلة أنا نايم"مأساة الوطن العربي الغافل والحق الضائع ل"الأبنودي"

في دي الليلة أنا نايم

وصاحي عدوي

يدفن في الشباب الحي

ببلدوزرات

بطيارات

نزل واحد على سريري وأنا نايم

جيت قايم

وأنا مفزوع

أحاول أبعد الجثة

أشيل الدم من الفرشة

ألّم ذراع كان منزوع

وناشف

إنما … مرفوع

بيهتف لسه رغم الموت

يصحي القصة في سريري

يشيل الحلم من راسي

لقيت الريق مش مبلوع

وماليش صوت

أو بانطق بصوت غيري

وقمت …

جريت للشارع

رميت نفسي في وسط عباد

وناقشنا حكاية دفنكم احياء

وقلنا: يسقط الأعداء

وهددنا الصهاينة هناك

بميت قبضة في وش الجو

وحييناك … وهاجمنا عدو السو

لكن لما شعرت بجوع

أنا حودت عالحاتي

طلبت كباب

معاه … بيرة

أنا أصلي بأحب اللحم … والبيرة

لقيت قلب الطبق

مكتوب عليه (بيت لحم)

وعلى البيرة

مكتوب (البيرة)

سكرت … وطفت

بين الصحيان والوهم

لقيتني في يافا

وفي حيفا

وفي نابلس وفي الناصرة

وفي بيت لحم وفي غزة

وقشعر جسمي

ساعة الحزن ليه هزة

خفت … وقمت

هربت أوام

لقيت نفسي في قلب البيت

لقيت الفرش من غير دم

عرفت أنام

أنام

والعالم العربي

سبقني ونام
............
يا خيي إنت وحداني

أنا صاحبك في جورناني

ساعة ما يذبحوك أصرخ

وأتلوى في أحزاني

لكن عمري ما مديت يد

أحوش باليد مدة يد

أنا موهبتي في لساني

ومش موهوب في شيء تاني
ولا مقاتل

ولا محارب

ولا مودي

ولا جايب

حبيبك … إنما شفوي وقلباوي

لكن لا طبيب ولا مداوي

ولا بأعرف أخوض الموت … ولا ناوي

أنا في كل ده خايب

ومش ظهرك

ومش سندك

ومش بلدك

ومش بلدك

وبأستغرب على جلَدك

فلو حتحس لخيك يوم

حتنادي

تلاقيني في عز النوم

أنا والعالم العربي

ليلاتي

زي ما بننام

الله عليك يا ميمو يا جامد

بجد الابنودى دة مالوش حل رغم ان الكلام كان صعب اوى فى الاول بالذات الحته بتاعة الزراع المقطوع الناشف دى

بس برافو

فعلا الأبنودي أعاد لشعر العامية رونقه وسابق عهده

وإن كان يتميز بالجرأة اللفظية فإنما إستمدها من طبيعته الشخصية الناكرة لكل خطأ
ولعل هذا كان سبب قضاءه لكثير من حياته بين متهم ومحاكم ومسجون في حب مصر

ولكنه يبقي كما هو أستاذ عصره في شعر العامية(الزجل)

ايه الحاجات الجامده دي ياميمو
الف شكر علي الموضوع الجميل ده

» لمحة تارخية عن الكشافة في الوطن العربي
» حركة المرشدات ...كيف بدأت في العالم وفي الوطن العربي
» "الشرق" ل"بيرم التونسي" كلام في المليان
» "حاجات ياما" من الشعر الحر ل"سعيد حامد"عبر عن احساسه فامتعنا بإحدى روائعه
» "كلب الست"للرائع "أحمد فؤاد نجم" المثال الأبسط لسطوة المال على القانون