من الفضائيات العربية.... حماده ابو دبيكى

السلام عليكم الشعر دا لواحد كان فى الغربة وبيحكى القصة بتاعته مع الفضائيات العربية وفيها بيقول


أما قبل
فى بلاد الله غريب ومسافر
لا الحرمة معايا
ولا الولاد جنبيا

وفى لحظة سرحت
وضاقت الدنيا فى عنيا
قلت لنفسى اقضى الوقت
واتفرج على القنوات الفضائية
واشوف الدنيا فيها اييه
واطمن على امتنا العربية
احترت أبدأ منين
ببلادنا واحدة ...حلمنا واحد ...همنا واحد
وانا راجل عندى حيادية


( أما بعد)
جتنى فكرة أبدأ بالجيران
وبكده أخلص من دي الاشكالية
قلت أبدأ من السودان
لقيت برنامج حواري
قدم المذيع ضيوفه
لابسين بدل شيك وكرفتات
من احسن المركات العالمية
فلان الفلانى ممثل حزب الأمة
طبال الظلامنى نايب فى الجبهة الشعبية
وبدأ الحوار عن الحالة الاقتصادية
أرقام بالملايين مصاريف
ونفقات ضرورية
بس كله بطريقة ودية
قلت ياسلام محلاها عيشة الحرية
لما تكون معاها رفاهية
وعلى الشاشة جت صورة فى الخلفية
أطفال جوعي ...نسوان عريانه
وجثث على الارض مرمية
وفى أسفل الشاشة رسالة
بتقول ..... الوضع فى دارفور
صورة بالاقمار الصناعية
وفهمت من الكلام انهم بيطالبوا
بتقسيم الثروة بصورة متساوية
قلت فى نفسى عندهم حق
يعنى كل السودان من السادة
وهم ولاد الغجرية
ولا يعنى لازم توصيات امريكية
وبدل الثروة ياخدوا معاها نص السلطة
زى المنطقة الجنوبية


وننهى الكلام اليوم واكيد للفرجة بقية

غيرت القناة وجبت قناة تانية
مرسوم عليا تاج
عرفت بالفكاكة انها ملكية
صح والله ......
طلعت الفضائية الأردنية
وبالصدفة جت مذيعة كلمنجية
قالت ان الطقس برد قارص
مصحوب بأمطار رعدية
قلت بسيطة ...........
أهم عندهم دفايات وبطاطين
ماهى دولة غنية
شوية وجت النشرة الاقتصادية
اعلن المذيع بيان حكومى
مصحوب بتبريكات ملكية
عن رفع سعر المواد البترولية
ومعها رفع الفاتورة الكهربائية
سألت نفسى.....
والناس دى تعمل اييه ايام الشتوية ؟؟
رد المذيع بالصدفة عليا
وقال ....
"على المواطنين شراء الأخشاب واشعالها للتدفية"
قلت يعنى مش مهم
اللى يموت يموت كلها موته
بالخنقة ولا بالسكتة القلبية


وننهى الكلام اليوم واكيد للفرجة بقية

من قرفي دست علي الزرار
وبالصدفة جت قناة
مكتوب عليها " الفرات "
عرفت انها عراقية
مشهد بدون تعليق :
شباب زى الورد شايلين
جنازير وسلاسل حديديه
كل واحد يخبط على جسمه
بطريقة قوبة مصحوبة
بأصوات عالية وفتيه
قلت يمكن ده استعراض
للقوة العراقية ولا مظاهرة
ضد قوات الاحتلال الامريكية
والله ياعيال صدام طول عمركم
عرب وفرسان أشاوس
واماجد ونفسكم ابيه
فرحت وقلت كده قربت
نهاية الغطرسة الأمريكية
علي يد عيال العراق
أحفاد صلاح الدين
من بعد أجيال منسية
عشان يعرفوا إننا عرب
مانصبرش على الذل
والمهانة والعبودية
فجأة ظهر أسفل الشاشة
عبارة مكتوبة باللغة العربية
"احتفال الشيعة بالأربعينية الحسينية"
وتعالت الأصوات :
سنثأر ياحسين
لن نسكت ياحسين
الثأر للحسين.
قلت في عقلي :ثأر اييه
ومن مين؟
دا الحسين مات شهيد
من اكتر من الف سنه وتلات ميه
ومن مين ياخدوا التار
من الشيعة ولا الخوارج
ولا الروافض ولا السنية ؟
حرام عليكم ده الحسين شهيد
وسيد شباب الجنة
بشهادة خير البرية .
ياجماعة وحدوا صفكم
والتفتوا للجبهة الداخلية
وما تنسوش الحدود الخارجية
أعدائكم كتير :
أمريكا في الداخل ...
إيران في الشرق..
وتركيا بتضرب الحدود الشمالية


وننهى الكلام اليوم واكيد للفرجة بقية