"حاتجن ياريت يا اخونا ماروحتش لندن ولا باريس" احدي روائع بيرم التونسي

حاتجن يا ريت يا اخوانا ماروحتش لندن ولا باريز
دى بلاد تمدين ونضافة وذوق ولطافة وحاجة تغيظ

ملاقيتش جدع متعافى وحافى وماشي يقشر خص
ولا شحط مشمرخ افندى معاه عود خلفه ونازل مص
ولا لب اسمر وسودانى وحمص وانزل يا تقزقيز
حاتجن يا ريت يا اخوانا ماروحتش لندن ولا باريز

ولا عركة فى نص الليل دايرة بالحيل وساحبها بوليس
قدامها جدع متجرجر وشه معور قال يا عريس
الخلق ماهى بتتجوز واشمعنى احنا مفيش تمييز
حاتجن يا ريت يا اخوانا ماروحتش لندن ولا باريز

ولا واحده فى وش الفجر تبرطع ماليه الدنيا صوات
قال ايه جوز خالتى ام احمد سلفة اخوها السيد مات
سبحانك ما اعظم شانك والله الموت دا مفيد ولذيذ
حاتجن يا ريت يا اخوانا ماروحتش لندن ولا باريز

ولا واحد طالع يجرى وواحد تانى بيجرى وراه
ويقول ها هع حصلتك يابن اللى ابصر ايه عاملاه
لا الشارع غيط يا اخوانا ولا احنا بداره ولا احنا معيز
حاتجن يا ريت يا اخوانا ماروحتش لندن ولا باريز

ولا واحد بيبيع حاجة يقول بريال وتاخدها بصاغ
يا اخوانا دى حتى الابرة تاخدها بدوشة وقلب دماغ
حلفان وعراك ومناهده ويمكن ضرب كفوف يا حفيظ
حاتجن يا ريت يا اخوانا ماروحتش لندن ولا باريز

ولافيش ميت الف صعيدى بتوع يانصيب هاجمين ولافيش
ميت الف معوض داعس جاى معاه صندوق ورنيش
والله كرهن القهوة وحرمت اقعد ع الافاريز
حاتجن يا ريت يا اخوانا ماروحتش لندن ولا باريز

ولا شفتش ده اللى بلاسه وده اللى بعمه وده بطربوش
ملابسنا يا ناس تشكيله تعداصحابها ما يتعدوش
دول ناس كنا احسن منهم قول ومسيرنا باذن الله
نبقى احسن منهم برضك بعد الدرس اللى اخدناه
والله ده عيب نتهجى دروس يا اساتذه على التلاميذ
حاتجن يا ريت يا اخوانا ماروحتش لندن ولا باريز

هههههههههههه
عسل اوى
تسلم يا ميمو ابقى هاتلى بقى حاجات من دى كتير

بس ليا استفسار عندك او عند اكثم
يعنى ايه افاريز (اللى فهمته انها حاجة كدة زى كافيه)بس انتو ادرى بردو
افيدونا افادكم الله

بس كده
من عينيا
ليكوا عليا أفضل وراكوا لحد ماتبقوا على دراية تامة بكل الروائع

اما بقي بالنسبة للأفاريز .... فهى مفرد أفريز
والأفريز ده يعني البار او المكان اللى موجود في مقدمة الكافيه وبتلاقي عنده النادل او الساقي مباشرة وبالتالى مش هتحتاج جرسون يعني مش هاتضطر تدفع بقشيش ...

والله أعلى وأعلم

المهم انك سليم وما اتجنتش

موها

يا سلام يا ميمو

كرهتنا فى بلادنا

ههههههههههههه

بس بجد روعة

أحنا مستنيين من دة كتير

وياريت مش تغيب عننا تانى

» "يا اهل المغنى دماغنا وجعنا " لشاعر العامية الاول "بيرم التونسي"
» "أهل الهوي"ل"صلاح جاهين"رائعة تجمع أساطير العشق في التاريخ
» """"" امثال عالمية على البنات برضه """""
» "حاجات ياما" من الشعر الحر ل"سعيد حامد"عبر عن احساسه فامتعنا بإحدى روائعه
» "في دي الليلة أنا نايم"مأساة الوطن العربي الغافل والحق الضائع ل"الأبنودي"