الصيام وما وراء الاحداث ... (برنامج زهور الجنة في رمضان )

بسم الله الرحمن الرحيم
السلام عليكم

يا أهلا بيكم فى تانى ليلة من ليالى رمضان
ربنا يكرمنا فيه بالحسنات ومضاعفاتها ويرحمنا فيه برحمته ويجمعنا سوا إن شاء الله فى الفردوس الأعلى من الجنة مع سيدنا رسول الله الكريم سيدنا محمد صلى الله عليه وسلم أشرف الخلق أجمعين

تعالوا النهارده نحس بمعنى جميل للصيام

لما نتكلم عن رمضان .. إذا فالكلام لا يخلو عن الصيام
ولا يحلى الكلام إلا بذكر الله ونبينا محمد عليه أفضل الصلاة والسلام

*-* الصيام مش بس عن الطعام
زمان .. السيدة مريم أم سيدنا عيسى عليه السلام قالت " إنى نذرت للرحمن صوما فلم أكلم اليوم إنسيا "
ولما سيدنا زكريا عرف إن ربنا هيرزقه بولد .. " قال رب إجعل لى آية .. قال آيتك ألا تكلم الناس ثلاث ليال ِ سويا "

طيب .. إحنا دلوقتى ممكن نصوم عن ايه تانى غير الطعام .. تعالوا نشوف المشهد دا ونكمل بعدها ...

وبلغنى أيها الملك السعيد .. ذو الرأى الرشيد
إن أعدة حجيجة وستيتة على المصطبة زمان .. بتتكرر مع بنات وشباب هذه الأيام
ولا تخلو من الغيبة والنميمة وكمان البهتان .. ربنا يعافينا من هذا الكلام

حلا: هاى نجلا
نجلا : هاى حلا
حلا : شوفتى الواد تامر عمل ايه فى نوسة الكلبوزة
نجلا : عمل ايه دا ياما ضحك على البنات وبيعمل فيهم مقالب هههههههههههههه
حلا : كلمها فى التليفون وضحك عليها وقالها إنه بيحبها وهيموت عليها وهى كلتمنى وحكت لى
نجلا : ايه دا معقول ؟ هو مش كان مرتبط بسوزى الإسبوع اللى فات
حلا : اه .. ماهو سابها بقى .. حب يبلعب مع وجه جديد
نجلا : طيب ماهو كلمنى فى الموضوع دا قبل كده وانا رفضته .. أصله واد مايع كده ، سيبك بقى من حكاية الواد دا وقوليلى هو الدكتور فهمى طلق مراته ليه ؟
حلا : هو انا كنت معاهم وقت ما طلقها ؟ عموما أنا هقولك على اللى سمعته يا ستى
نجلا : ماشى بس قولى كل اللى عرفتيه
حلا : ياستى ظبطها بتكلم واحد فى التليفون وبعد ما قفلت السكة .. جاب الرقم من الآى دى واتصل عليه ، ولما لقاه راجل غريب وطلع فى بينهم حكاية طلقها بعدها بكام يوم
نجلا : ايه اللى بتقوليه دا .. أنا سمعت من سوزى إن مراته هى اللى طلبت الطلاق علشان مش عايزها ترشح نفسها فى منصب كبير فى النادى الهاى اللى ساكنين ادامه
حلا : ايه دا مين قالك كده ..! عموما يا ستى بكره كل حاجة هتبان .. وهنجيب فى سيرتهم أشكال وألوان ههههههههههههههههههههه


يا سبحان الله .. بنات تافهة واللا فاضية واللا عقلها خفيف
حكايات هبلة وماليها معنى ولا بيحلوا و يربطوا .. وبيعكروا النظيف
غيبة ونميمة وكمان بهتان .. فين يروح عملهم بين الأكفان ؟
هو الصيام دا ايه .. منع طعام عن البطون وخلاص ؟
وسير الناس بينهم عادى .. والحقيقة بلسانهم تنداس ؟
لا والله دا الصيام أعلى من كده
واللى عنده كلام غير دا .. يجي يقول غير كده


*-* شفتوا ..
شفتوا حال بعض البنات و الشباب بقى إزاى
ما نفكرش إن أعدة المصطبة بس للستات الكبار أدام البيت .. لا .. دا كمان بيكون موجود عند بعض البنات الحلوين والشباب الرجالة اللى ممكن يكونوا بيعملوا حاجات غلط وهم مش عارفين انها مش تمام ..


*-* الصيام ..
صيام عن الطعام وبس ؟
أكيد كلنا هنقول لأ طبعا ..

تعالوا نشوف أحاديث قدسية جميييييييييييلة جدا عن الصيام وأنواع تانية منه

" الصيام جُنَّة ، فلا يرفث ولا يجهل ، وإن إمرؤ قاتله أو شاتمه فليقل : إنى صائم مرتين ، والذى نفسى بيده لخلوف فم الصائم أطيب عند الله من ريح المسك ، يترك طعامه وشرابه وشهوته من أجلى ، الصيام لى وأنا أجزى به ، والحسنة بعشرة أمثالها " من صحيح البخارى

" من لم يصم جوارحه عن محارمى فلا حاجة لى فى أن يدع طعامه وشرابه من أجلى" أخرجه أبو نعيم عن ابن مسعود

" كل عمل ابن ادم له الا الصيام فانه لى وانا اجزى به والصيام جنة واذا كان يوم صوم احدكم فلا يرفث ولا يخب وان سابه احد او قاتله فليقل انى امرؤ صائم والذى نفس محمد بيده لخلوف فم الصائم اطيب عندالله من ريح المسك وللصائم فرحتان يفرحهما اذا افطر فرح بفطره واذا لقى ربه فرح بصومه "

ياااااااااااااه .. دا مش بس إننا نصوم عن رد الشتيمة للناس ، ونصوم عن الطعام ، والشهوات كمان .. دا جوارحنا نفسها لازم نخليها تصوم .

هى ايه الجوارح ؟ وإزاى نخليها تصوم ؟
اللسان / الأذنين / العينين / اليدين / الأنف / الرجلين وما بينهما

اللسان : كله كوووم واللسان دا كوم تانى ..ربنا قال آيات فى حق الكلام واللسان و سيدنا محمد قال أحاديث تشيب القلب بجد

قال تعالى " يا أيها الذين ءامنوا إتقوا الله وقولوا قولاً سديدا "

وقال تعالى " ما يلفظ من قول إلا لديه رقيب عتيد "

وعن أبي هريرة رضي الله عنه _ قال : قال رسول الله صلى الله علية وسلم : " من كان يؤمن بالله واليوم الآخر فليقل خيراً أو ليصمت "

وقول الرسول صلى الله عليه وسلم لمعاذ بن جبل ، حينما سأله : أنؤاخذ بما نقول ؟
فقال صلى الله علية وسلم ": ثكلتك أمك يا معاذ ، وهل يكب الناس في النار على مناخرهم إلا حصائد ألسنتهم " وفى رواية أخرى ( على وجوههم )

شايفين ممكن اللسان بس لوحده ممكن يوصلنا لفين ؟
معنى الكلام دا كله إننا لو هنتكلم فى شيء فى الخير .. نتكلم
لكن لو هنجيب فى سيرة الناس بس مجرد نسلى وقتنا ونحكى مع بعض .. يبقى نسكت أحسن

نعود نفسنا إننا لما نتكلم فى اى موضوع سواء يخصنا أو يخص غيرنا .. يبقى من جوانا نية إننا نصلح من اى شيء غلط فى الموضوع أو نساعد بخير .. مش مجرد فضول إننا نعرف اللى بيحصل وبس

الأذنين : نبعد عن سماع اى كلام يخلينا نضعف.. نبعد عن أى كلام حرام .. اى نميمة وغيبة .. اى كلام فى اى كلام مش هنحل ولا نربط فيه .. الشتائم واللعن والتريقة .

العينين : بكل ما نستطيع من قوة إننا ما نشوفش اى شيء ربنا حرمه .. نغض البصر ولا أقصد التنفيض للى بيتكلم معاك

اليدين : نبعدهم عن اى شيء حرام

الأنف : نشم الطيب ونبعد عن الخبيث .. لا كولة ولا بودرة تتشم .. ولا تشم فى ريحة بنت ماشية من جمبك ( طبعا هو الأساس ما يكونش للبنت ريحة بره البيت )

الرجلين : ما نروحش لأى مكان فيه شيء غلط أو حرام .. ونحفظ ما بينهما

وقال تعالى : " يوم تشهد عليهم ألسنتهم وأيديهم وأرجلهم بما كانوا يعملون"

فى فرق كبير بين كلمة يعملون ويفعلون
تعالوا نعرفها سوا .. علشان تعرفوا أد ايه ربنا رؤف بينا ورحيم
يعمل : يعنى إنسان يعمل شيء وهو مقتنع بيه من جواه وراضى
يفعل : يعنى إنسان يعمل شيء وهو مش مقتنع ومش راضى أبدا من جواه .. او مش قصده اساسا

شفتوا أد ايه ربنا أعلم بينا من أنفسنا وهيحاسبنا على اللى بنعمله مش اللى نفعله من غير قصد ولا رضى

طبعا مش هنقدر نمشى إلا لما نعرف فوائد الصيام ..
• الصيام بيبعدنا عن النار .
• الصيام بيقلل نسبة الشوائب فى الأوعية الدموية ومن خلاله بنستعيد صحتنا .
• للصائم عند إفطاره له دعوة مستجابة .
• من فطر صائما فله أجران .
• الملائكة تستغفر للصائمين كل يوم .
• فى السحور بركة .. والله يرحم المتسحرين .


*-* فى حاجتين مهمين جدا جدا فى الصيام ...
قال رسول الله صلى الله عليه وسلم " عجلوا الإفطار وأخروا السحور " أخرجه الطبرانى

الحاجتين دول مهمين .. يعنى يجي وقت الإفطار .. نفطر .. ومش نأخر الإفطار ونقول نصلى الأول .. نفطر ولو بشربة ماء ، والحاجة التانية نتسحر وياريت لو كان متأخر وياريت بقى نتسحر قبل الفجر بساعة او نص ساعة مثلا بحيث ناخد راحتنا فى الأكل ( ونمضغ كويس ) .. علشان نقدر نصلى بعدها الفجر حاضر وكمان فى جماعة إن شاء الله مع الأهل أو المعارف .


*-*طيب ...
إحنا إتكلمنا النهارده عن الصوم وأنواعه .. وعن ربنا بيحب ايه فى صومنا
وإتكلمنا عن إن فى أخطاء ممكن نكون بنعملها أو حد بيعملها أدامنا
لكن ما إتكلمناش نصلحها إزاى

مثلا .. لو واحد صاحبك / صحبتك .. اتكلمتوا فى موضوع ما .. وبدأ الكلام يسير عكس الإتجاه ويسير تجاه النميمة أو ما إلى ذلك ( كلام مش هتحل ولا هتزيد فيه بشيء خير ) .. هتعمل إيه ؟؟؟؟؟


ومن قلبى ليكم دعوتين هدية بظهر الغيب
اللهم لك الحمد كما ينبغى لجلال وجهك وعظيم سلطانك
يا أرحم الراحمين يارب العالمين يا رب العرش العظيم
إغفر وإرحم الجميع برحمتك التى وسعت كل شيء
وأرزقنا صياما طيبا هنيا وتقبله منا يا أرحم الراحمين وإحفظ جوارحنا يارب العالمين
وصلى اللهم وسلم وبارك على سينا محمد وسلم تسليما كثبرا

وكل يوم وإنتم مبسوطين