إنت ورمضان والإدارة

كنت بتقول ..
• نفسك تعمل مشروع لكن مش عارف تعمله ؟
• نفسك تبطل سجاير لكن مش قادر ؟
• نفسك تتعلم شيء جديد لكن ما فيش وقت / مافيش فلوس ؟

كنت بتقولى ..
• نفسك تخسى لكن بتضعفى أدام الأكل ؟
• نفسك تعملى مشروع لكن مش قادرة تتعلمى حاجة جديدة ؟
• نفسك تبقى حاجة كبيرة فى المجتمع لكن لسه ما إتعلمتيش القراية والكتابة ؟

كل دا نفسكم فيه ..... ومش قادرين تحققوه ؟

أمال رمضان بيعمل ايه !!!
أكتر شيء رمضان بيعمله معاك إنه يظهر لك الإراده اللى جواك

هى إيه الإراده ؟ وتفرق إيه عن الدافع ؟
بإختصااار شديد جداً ..
لو أنا قلتلك تعالى هديلك 10000 عشر آلاف جنيه .. وإطلع الهرم
حاجة من إثنين ..
إما / هيكون عندك إراده إنك تطلع الهرم .. لإن كان فى دافع اللى هى الفلوس
وإما / هيبقى نفسك تاخد الفلوس لكن معندكش إراده تطلع الهرم
وإما الثالثة دى من عندك بقى / وهى إن عندك إرادة ( داخلية) تطلع الهرم سواء فى فلوس أو لأ

طيب إحنا فى رمضان عندنا إراده علشان فى دافع ..
عندنا إراده نقف ساعة نصلى ورا الإمام 11 ركعة نافلة ، دا كله علشان فى حسنات مضاعفة فى رمضان ، وماشاء الله نسبة الحشمة ( كلمة من سنة 30) فى البنات والستات بتعلى فى رمضان جدا علشان ما ناخدش سيئآت ، وشرب السجاير مع الرجالة والستات ( للأسف) والشيشة هى كمان بتقل ( على الأقل فى فترة الصيام الصبح ) ، وعندنا إراده كبيرة جدا لختم القرآن مرة وإثنين وثلاثة ( وأكتر ) فى شهر واحد علشان حسناته كتيرة ، الحرف بحسنة والحسنة بعشر أضعافها ويضاعف الله لمن يشاء بأكثر ، ويا سلام بقى على الصدقات ماشاء الله من إفطار إلى فلوس إلى ملابس و و و و .

وبعد رمضان هيبقى عندنا إراده واللا لأ ؟
• الناس اللى مننا و بيصلوا فرض أه وفرض لأ .
• البنات اللى شوية تتحجب وشوية لأ .
• الحلوين المسكرين اللى بيلبسوا لبس ما ينفعش يتخرج بيه من البيت ( ضيق ، قصير ، أو شفاف ) .
• الشباب اللى بيقعدوا على الأهاوى ، ومكسلين يدوروا على شغل .
• البنات والشباب الصغير اللى لسه ما إتعلموتش قراية وكتابة لحد دلوقتى .
• الشوارع اللى بتتنظف وتتوسخ فى ثانية .
• الأتوبيسات والقطارات اللى ما بقاش الشباب الصغير فيهم يقفوا للناس الكبيرة.
• الشوارع اللى بنشوف فيها بعنينا البنات بتتعاكس وبنخاف نقول للغلطان عيب ( لم نفسك ) خايفين يسمعنا كلمتين وحشين .

الإراده مش بتظهر بس فى العبادات .. الإراده بتستمر معاك فى المعاملات .. بتفيدك فى حياتك إنت
ما هو إحنا نفس الشباب اللى بنصلى فى رمضان الفروض كلها حاضر وجماعة .. بردو إحنا نقدر ( عندنا إراده ) نكمل بعد رمضان ( لكن فى مننا مش بيستغل إرادته لإن ما فيش دافع ) .. خرج إنت من جواك الدافع

إحنا الشباب اللى بنقف ورا الإمام بالساعة فى التراويح ،، وإحنا هم هم نفس الشباب اللى بنركب المواصلات ومش بنقف للكبير فى السن ( بنقول ما هو الكل تعبان ) ..

هنجيب إراده منين لو ما إدربناش فى رمضان على الإراده ؟

إعرف نفسك ..
الإراده كده كده جوانا .. بس إحنا اللى بنصحصحها او إحنا اللى بنقولها ننه هوووو ( مش وقتك دلوقتى ، أنا هتعب نفسى ليه )

فى أحوال شباب كتير حوالينا ( لو بصينا هنلاقيهم ) بيفضلوا على القهاوى مستنيين ست الوظيفة هانم تجيلهم ( ياختى سكر ) أوالشاب منهم ما يشتغلش علشان الدنيا كلها بقت بالواسطة وهو ما عندهوش واسطة ( ياختى على الإحباط ) ، لكن يوم ما بيجي الدافع ( إحم إحم البنوتة السكر اللى قلبه يحبها ) يبتدى المفاعل الذرى يشتغل والإراده تطلع ويبقى هيكسر الدنيا علشان يجيب فلوس من اى مكان ( بالحلال ) علشان يتزوجوا ويعيشوا فى هنا ( إن شاء الله ).. دول بالله عليكم نقولهم إيه ؟

ماكان من الأول كنت توفر على نفسك سنييين كتير تضيعها فى الهوا

عندنا إراده إننا نساعد الكبار فى السن ، وعندنا إراده نبطل السجاير ، وعندنا إراده نشتغل فى اى مهنة ما دامت حلال ، وعندنا إرادة نخلى الشوارع نظيفة ، وعندنا إراده ما نلوثش عنينا بالحرام ، وعندنا إراده نلبس لبس يليق بالمسلمين والإسلام نظيف ومهندم ، وعندنا إراده نقرأ القرآن ونختمه كل شهر ، وعندنا إراده نشوف إى محتاجين أو اى جمعية ونتطوع ونخدم فيها ولو لوقت بسيط ، وعندنا إراده نبعد عن الخبيث ونقرب من الطيب ، وعندنا وعندنا وعندنا

عندنا إراده .. هتطلع إمتى ؟
هو إحنا ما ننقذش نفسنا إلى فى آخر لحظة .. لما وقت كتير يعدى فى الهوا ؟

ودلوقتى
مثلا ..
• عندى إراده اتعلم 5 برامج جديدة عليا فى التصميم فى شهرين .. والدافع إن الجديد دا هيكون سبب فى زيادة الدخل .
• وإراده أختم القرآن 3 مرات فى الشهر دا .. والدافع إن الحسنات كتييير ومضاعفة .. لله رب العالمين.
• وإراده أشجع الشباب علشان يشتغلوا ويبنوا نفسهم .. والدافع أهمية إنهم يلاقوا نفسهم ويتوكلوا على الله وما يتواكلوش على حد فى حياتهم .
إن شاء الله

إنت عندك إرادة تعمل إيه ؟ وليه ؟

على الخير دايما متواعدين
وكل يوم وإنتوا طيبين